霸氣巴塞讓主手到拿來|東方日報
特别贴士
2023-05-04 18:59:11
西甲榜首巴塞隆拿主場迎戰奧沙辛拿，雙方實力相距懸殊，加上奧沙辛拿將於周日凌晨西班牙盃決賽鬥皇馬，好大機會留力「放棄」今仗聯賽，隨時大敗。事實上，巴塞隆拿近8次主場對奧沙辛拿，有7次贏4球或以上，一於直取讓球主勝。（Now632周三凌晨1時30分直播）
巴塞隆拿已經拋離第2位皇馬11分，僅剩下6輪聯賽，奪冠機會十拿九穩，雖然球隊近期成績有些少走樣，但主要係作客失分，喺自己地頭魯營球場出擊，仍然交足功課，近兩仗主場分別擊敗兩支前列強隊馬體會及貝迪斯，特別係上仗大炒貝迪斯4蛋，上半場已領先3球，盡顯王者霸氣，恐怕奧沙辛拿難以招架。
奧沙作客魯營常被大炒
奧沙辛拿繼2005年之後，球隊史上第2次打入西班牙盃決賽，對於呢支長年陪跑分子而言，絕對係一項「偉大成就」，球隊上下肯定將全副精神放喺下仗西盃對皇馬嘅終極一戰。至於今仗聯賽勝負可以話無關痛癢，就算教練艾拉沙迪輪換陣容，以副選比賽亦無可厚非。奧沙辛拿以往作客巴塞，經常被大炒，更何況今場「留力」，預料會吞多幾隻光蛋而回。
