車路士慢熱半和益李|東方日報
特别贴士
2022-05-20 18:19:49
今晚英超車路士主場迎戰「狐狸」李斯特城。車仔剛於英足盃決賽互射12碼不敵利物浦，痛失冠軍打擊士氣，加上球隊近期主場表現飄忽，就算有地利亦難有把握喺比賽早段攻破對手，半場和可以捧場。
（Now622周五凌晨3時直播）
車路士啱啱喺英足盃決賽同利物浦鬥足120分鐘，最終互射12碼落敗，同獎盃擦身而過。呢支倫敦勁旅激戰過後元氣大傷，一班球員亦難免感到失落，加上聯賽早早跌出爭冠行列，只能無奈接受冇盃落袋嘅殘酷現實。已鎖定英超前4嘅車仔季尾表現飄忽，同攻力疲弱不無關係，尤其球隊近7仗聯賽主場，半場全部同對手打和，證明冇乜板斧，貴價前鋒盧卡古成季都未能踢出最佳水準，車仔進攻難有作為。
李城例行公事唔慌搏
無緣爭奪歐戰席位嘅李斯特城冇嘢好爭，餘下賽事成為例行公事，佢哋聯賽作客好耐未贏過，今仗面對車路士亦唔敢冒進。考慮到「狐狸」頭號射手占美華迪已經傷愈復出，車仔必然會加以提防，預料兩軍比賽早段都會以試探性質為主，半場和屬不二之選。
