哈化低迷撐漢堡反客為主|東方日報
特别贴士
2022-05-20 18:19:50
今晚上演德國附加賽首回合大戰，由德甲排尾3嘅哈化柏林，主場迎戰德乙3哥漢堡，兩隊要踢兩回合決定邊隊拎到下季德甲席位。哈化柏林近況低迷，3仗不勝下最後一輪畀史特加「爬頭」，跌落尾3要踢附加賽；相反漢堡近4場全勝搶到附加賽席位，士氣此消彼長下，今場客勝可取。
（有線662及602台周五凌晨2時30分直播）
哈化柏林上場聯賽半場領先下，畀多蒙特反勝2比1，最終因為得失球較史特加差，搞到要踢附加賽爭取留級。球隊今季歇冬後表現差勁，17場聯賽只係贏過3場，狀態相當低迷，佢哋最大問題係攻力疲弱，首席射手祖維迪都只係入得6粒，另外防守同樣令人擔憂，34場聯賽勁失71球，屬於德甲第二多，今場就算主場出擊都咪高估。
基列素大勇近6仗轟5粒
漢堡喺德乙煞科戰有驚無險下，作客3比2險勝羅斯托克，成功力壓達斯泰達拎到附加賽席位。呢支老牌球會季尾狀態大勇，聯賽5連勝之餘狂轟16球，當中首席射手基列素絕對係最大功臣，呢位德國籍高大中鋒今季個人貢獻22球，近6場更交出5個入波，勢對哈化後防構成好大威脅。論近況漢堡贏成條街，今場有力反客為主，一於撐客勝。
