法國超班半場速食科特迪瓦|東方日報
特别贴士
2022-03-26 17:04:41
世盃盟主法國為備戰年底決賽周，周六凌晨約戰非洲球隊科特迪瓦。法國領隊迪甘斯點兵精銳盡出，明顯非常重視今次練兵機會，一眾國腳亦要為激烈嘅正選爭逐而搏命，預料落場會施展渾身解數爭勝。法國技高一籌兼有鬥心，主場出擊有望先發制人，半場主勝值博。（有線661及601台周六凌晨4時15分直播）
麥巴比同法國足總反面？
法國喺世盃外輕鬆出線，上年亦喺歐國聯勇奪冠軍，展示出超班實力。「高盧雞」喺世盃決賽周展開前愈戰愈勇，近5場國際賽全勝，而且全部都喺上半場領先，搶攻踢法成效顯著。
法國國家隊鋒線競爭異常激烈，強如奧士文尼迪比利都冇份入選，今仗首獲徵召嘅尼干古等當然要搏命展示實力，至於重返國家隊嘅老將基奧特亦要「騷哥利」，加上基利安麥巴比、基沙文同保羅普巴等核心在陣，法國實力超班，今仗可望輕鬆取勝。
唯一擔心係有報道指基利安麥巴比近日同法國足總反面，話說法國國家隊安排球員出席公開商業活動，不過呢位新世代球王拒絕出席，就連法國足總主席出面游說都「冇面畀」。傳媒推測麥巴比之所以拒絕，係因為覺得出席某部分品牌宣傳活動，會影響自己嘅道德形象，所以唔想同有關品牌扯上關係。但亦有報道認為，麥巴比正為個人前途問題而煩惱，加上近來PSG分別喺歐聯及聯賽連番失利，因此想減低曝光率，避免遭媒體同球迷批評。不過點都好，要佢喺科特迪瓦身上入波，的確難度不大。
科特迪瓦喺非國盃16強出局，表現強差人意，主力前鋒尼高拉斯比比喺球會上陣機會唔多，狀態成疑。另一尖刀、效力英超水晶宮嘅韋費特沙夏，原來喺國家隊已經接近兩年半冇入過波，今仗要挑戰法國防線有極大難度。科特迪瓦狀態低迷，作客出戰相信連上半場都頂唔住，捧半場主勝最好路。
