穩鬥穩埃及塞內加爾細均力敵|東方日報
特别贴士
2022-03-26 17:04:43
世盃外非洲區第三圈首回合大戰，周六凌晨埃及主場硬撼塞內加爾。埃及早前喺非國盃決賽不敵塞內加爾，今次再於世盃外碰頭，當然希望一雪前恥，但兩軍近年相遇踢得保守，今場隨時再陷入膠着，1.5球入球細不容錯過。（myTVSUPER周六凌晨3時30分直播）
世盃外非洲區打到嚟第三圈，今圈勝方將可以取得2022年世盃決賽周入場券，因此兩軍必然高度重視。回顧2月初上演嘅非國盃決賽，埃及同塞內加爾踢足120分鐘，結果都係互無紀錄，要靠互射12碼才分出勝負，最終由塞內加爾摘得桂冠。
與出戰非國盃決賽周大軍相比，雙方今次主力陣容分別不大，埃及繼續有穆罕默德沙拿入選，擔起進攻大旗，塞內加爾則有沙迪奧文尼領銜鋒線。雖然有兩大利物浦攻擊好手壓陣，但雙方其實都係以出色防守見稱嘅球隊，踢法穩陣。
近8次對賽6開1球或以下
非國盃賽場上，兩隊之所以能夠挺進決賽，與穩健防線表現不無關係，其中埃及近7仗只失2球。至於塞內加爾亦有悍將高列巴尼同艾度亞文迪等後防猛將，佢哋喺歐洲頂級聯賽效力，有能力將塞內加爾後防打理得滴水不漏。加上兩軍近8次交手，有6次開出1球或以下，今次碰頭預計入球亦唔會多，吼實中位數1.5球入球細。
