意大利歎細界|東方日報

特别贴士 2022-03-24 18:37:47

今晚世盃外圍賽歐洲區附加賽C組，意大利主場鬥北馬其頓。意大利自上年贏得歐國盃後，表現走下坡，加上傷兵問題嚴重，不宜高估。北馬其頓自知實力唔及對手，應會屯重兵防守伺機打突擊，加上意軍近8場世盃外有7場總入球開2球或以下，可追2.5球入球細。（有線662及602台周五凌晨3時45分直播）

意大利喺分組賽被瑞士搶走小組首名直接出線資格，搞到要靠附加賽爭取亮相世盃決賽周。除咗捧完歐國盃後鬥心大不如前，意軍另一隱憂係主力費達歷高基艾沙因傷收咧，射手恩莫比尼踢國際賽向來麻麻，另一大將恩斯治尼亦狀態平平，面對北馬其頓嘅「鐵桶陣」，恐怕老鼠拉龜無從入手。

北馬其頓一心死守
北馬其頓上年都有出席歐國盃決賽周，分組賽3戰全敗出局，證明未夠班喺大賽立足，加上老牌射手彭迪夫已經退出國家隊，難以對意軍防線構成威脅。預料佢哋策略都係一心死守搵突擊機會，甚至等互射12碼博爆冷，今場入球唔慌多。

上一篇：歐洲區附加賽4強駁火葡萄牙做大騷|東方日報

下一篇：歐洲區附加賽4強駁火葡萄牙做大騷|東方日報