世界盃：厄瓜多爾防守硬淨 科特迪瓦半和追多鋪_東方日報
特别贴士
2026-06-14 22:44:11
E組首名普遍被認為係德國囊中物，科特迪瓦同厄瓜多爾喺呢組亦係出線競爭對手，大家唔想輸預計踢得謹慎。厄瓜多爾擁有車路士防中摩西斯卡些度，以及巴黎聖日耳門後衞威廉柏曹，鐵桶陣密不透風，最後5場世盃外保持不失，當中4場半場與對手打和，今場不妨再追半場和。（Now 618及616周一早上7時直播）文:路西法
科特迪瓦係今年初嘅非國盃熱門之一，不過最終不敵埃及8強止步，但球隊之後4場熱身賽取得4連勝之餘，當中包括以2比1擊敗法國，狀態正在冒起。
厄瓜多爾防守硬淨
「大象國」擁有曼聯球星阿密特迪亞路、恩迪奧文迪、安治邦尼及尼高拉斯比比等進攻球員，相信領隊化爾都會以進攻為主要戰術，不過球隊中堅伊雲尼迪卡喺「羅馬打吡」受傷未完全復原，今場將會倦勤，或多或少影響到球隊防守。
厄瓜多爾喺南美洲區外圍賽因派出違規球員被扣3分，但仍僅次於阿根廷，力壓巴西、烏拉圭等位列次席，球隊穩健防守係箇中關鍵。比卡塞斯喺2024年8月接手，除咗首場輸畀巴西外，計到去決賽周臨開波前嘅熱身賽，累積19戰8勝11和保持不敗。
效力車路士嘅防守中場摩西斯卡些度築起厄瓜多爾第一道屏障，再加上歐聯決賽雙雄PSG嘅威廉柏曹及阿仙奴嘅軒卡派爾喺後邊守住，球隊喺外圍賽18戰只失5球，近5場正式賽事全部保持不失，當中4場半場與對手打和，今次喺世盃大舞台，面對科特迪瓦來襲，相信都會照辦煮碗，再追半場和。
