英足盃：逼走羅Sir重現真章 車仔出斯大反擊_東方日報
特别贴士
2026-04-26 23:05:02
今晚溫布萊球場上演另一場英足盃4強賽事，車路士對列斯聯，「車仔」日前炒咗「犯眾憎」領隊羅仙尼亞，今仗由U21主帥麥法蘭領軍第1擊，球員應該會結束「工業行動」，發揮正常水平，全力搶攻爭勝。至於列斯聯近期火力全開，無懼同車路士鬥攻，加上兩隊近7次交鋒有6次總入球開3球或以上，不妨追中位數2.5球嘅入球大。（Now 651周日晚10時直播）文:Mic少
車路士上場英超以0比3大敗於白禮頓腳下，近114年以來首次聯賽5連敗兼冇波入，單睇數據的確非常差，但要考慮背後原因。據悉由於球員唔妥羅仙尼亞，故意踢出差劣成績逼佢落台，既然目的已經達到，就冇必要再「玩嘢」，反而會爭取贏番場漂亮勝仗，證明「羅Sir」係球隊陷入低潮唯一真兇，預料今仗好大機會反彈。
車路士看守領隊麥法蘭喺今年1月初，亦曾經短暫接替被炒嘅馬利斯卡，並率領球隊打和曼城，屬有料之人，必定會把握今季餘下賽事，帶領「車仔」爭取佳績，一旦奪得英足盃冠軍，隨時下季有機會坐正，呢位40歲少帥今場應會採取主攻戰術，協助球隊大翻身。
列斯聯撻着鬥攻
另邊廂，列斯聯嘅聯賽護級壓力經已大減，難得有機會爭盃賽錦標，今場肯定會搏到盡。加上球隊近況出色，早前英超「玫瑰打吡」爆冷作客以2比1擊敗曼聯，其後大勝狼隊3比0，上場打和般尼茅夫2比2，換言之近3仗合共轟入7球，攻力有保證，足以撕破車路士防線，2.5球入球大值追。
