英超：頹爆藍戰士𡁻唔落拖肥_東方日報
特别贴士
2026-03-21 23:31:27
今晚英超「雙藍會」，愛華頓主場硬撼車路士。「藍戰士」近況曳到冇朋友，啱啱喺歐聯慘敗出局，士氣跌到谷底，想贏硬淨到暈嘅「拖肥糖」唔易，寧捧愛華頓讓球主勝（+1）。（Now 621周日凌晨1時30分直播）文:法達斯維
「藍戰士」狀態曳到爆，各項賽事近7仗法定時間贏得1場咁大把，單計近3仗輸晒，包括啱啱歐聯16強對巴黎聖日耳門，兩回合計慘敗2比8，非常肉酸，賽前仲話要重演世冠盃決賽擊敗ＰＳＧ嘅豪言，立即成為笑話。車路士近期場場有失波，連英冠仔域斯咸都入到佢哋兩粒，後防穿窿問題未解決，進攻核心高爾彭馬表現飄忽，近日更傳出中場安素費南迪斯話唔清楚下季會否留隊嘅消息，雖然教頭羅仙尼亞否認此事，但亦反映出內部軍心不穩。
愛華頓硬淨受讓筍
另邊廂，愛華頓表現平穩，各項賽事近11仗僅3敗，就算上仗輸畀阿仙奴，都係鬥到末段先失守，再次顯示出呢粒「拖肥糖」堅韌難𡁻。翻查紀錄，愛華頓近8次主場迎戰車路士只係輸過1次，絕對有力頂住呢班近期頹爆嘅「藍戰士」，「拖肥」讓球主勝（+1）咪走寶。
