英超：地頭11連勝激發鬥志 維拉食住上主W嗒糖_東方日報
特别贴士
2026-01-19 22:51:38
今晚英超大戰，阿士東維拉主場迎戰愛華頓，維拉聯賽高踞前三，上場足總盃輕鬆晉級，歐霸盃亦出線在望，3條戰線順利推進，球員鬥志高昂，而且佢哋主場特佳，近11場主場全部贏晒。相反，「拖肥糖」高不成低不就，仲剛喺足總盃出局，士氣唔慌好，今場想唔輸都難，維拉主勝放心捧。（Now 621及611周一凌晨零時30分直播）文:邪神
維拉近況確實冇得彈，之前試過各項賽事11連勝，去年年底輸畀阿仙奴後立即贏番森林重回正軌，現時落後榜首阿仙奴6分，上場足總盃作客照贏熱刺，奧尼屈堅斯同摩根羅渣士着晒火，就算後備殺手唐耶爾馬倫宣布外借羅馬，但領隊艾美利已經計晒數，今場同嚟緊歐霸盃作客費倫巴治都夠人用，可以全力出擊。
再睇維拉主場成績相當驚人，各項賽事累積11連勝，所贏對手包括曼城同阿仙奴兩支爭標球隊，對住中型班森林、般尼茅夫同富咸等至少攻入3、4球，贏到唔識停，球員更慢慢建立一股必勝信念，今場對住「拖肥」當然嗒晒糖。
愛華頓主將缺陣戰意成疑
另邊廂，愛華頓現時排12位，對下遠離降班區，對上歐洲賽資格又隔咗好多隊，正一唔上唔落，上場足總盃主場對新特蘭踢到互射12碼慘遭淘汰，今季冇晒目標，加上伊利文尼戴耶同伊祖沙古爾要幫塞內加爾爭非國盃缺陣，今場睇怕凶多吉少，捧維拉主勝之餘，同場過關「阿士東維拉勝&總入球多於2.5球&開出總角球多於9.5球」亦可兼顧。
