英聯盃：羅Sir考牌 VS 遇強保守 車仔阿仙奴倫敦細紀戰_東方日報
特别贴士
2026-01-14 23:06:59
今晚上演另一場英聯盃4強首回合大戰，「倫敦打吡」車路士主場惡鬥阿仙奴，車仔上場英足盃由新帥羅仙尼亞首次領軍，大炒查爾頓，但對手太弱，不宜作準，遇上同市宿敵兵工廠，將面臨真正考驗，預料「羅Sir」會採取穩陣戰術。阿仙奴少1日時間休息，體力會比較輸蝕，翻查雙方近3次交鋒總入球全開2球或以下，一於再追中位數2.5球嘅入球細。（無綫myTV SUPER周四凌晨4時直播）文:Mic少
車路士上場英足盃第3圈，羅仙尼亞收起多位主力，仍然大勝英冠球隊查爾頓5比1，戰術上最大改變係加快比較節奏，令對手難以招架。雖然「車仔」以「霸氣踢法」強攻弱隊，效果非常好，但對手換成英超榜首阿仙奴，恐怕未必奏效，一旦壓得太前，防線難免空虛，反而令「兵工廠」有機可乘。加上球員行軍速度快，意味會消耗大量體力，隨時後勁不繼，「羅Sir」必然知道當中利弊，應會因時制宜，以較穩健方式對付阿仙奴。
槍手體力輸蝕唔敢谷
事實上，羅仙尼亞啱啱上「車」，仍需要時間同球員磨合，以及慢慢了解其他英超勁敵，今仗硬撼阿仙奴，名副其實係「考牌戰」，只要唔輸已經合格，更加唔好期望獲得大勝。
另邊廂，阿仙奴剛於周日晚英足盃以4比1擊敗樸茨茅夫，比「車仔」少1日時間休息及備戰，緊密賽程之下，球員必須適當分配體力，唔會每場都搏到盡。同埋阿仙奴首回合先作客，只要力保不敗，次回合有地利，晉級機會就非常樂觀，領隊阿迪達或會採取留前鬥後部署。值得一提，阿仙奴今季作客名牌球隊，表現非常保守，包括英超小勝曼聯1比0，輸畀利物浦0比1，打和車路士1比1，今仗隨時歷史重演，中位數2.5球嘅入球細值得捧場。
