英超：紅軍蓄細待發捉黑貓_東方日報
特别贴士
2025-12-03 22:03:36
英超快車尾場，利物浦主場迎戰新特蘭。「紅軍」上仗收起穆罕默德沙拿，立即贏波止跌，但眾將信心仍有待提升，一定要穩陣行先，「黑貓」客場出擊例必保守，3.5球細盤捧得過。（Now 621及611周四凌晨4時15分直播）文:法達斯維
今季一直有傳利物浦王牌穆罕默德沙拿，同幾位新兵唔多夾，仲玩排斥只助攻畀舊人，「紅軍」主帥施洛上仗忍無可忍，棄用呢位王牌令佢全場坐波監，一班新兵如域斯、阿歷山大伊沙克即刻生晒，伊沙克更加有士哥，協助利物浦贏2比0，終止各項賽事3連敗。
當然，「紅軍」依家仍有好多問題，唔係贏咗韋斯咸立即迎刃而解，尤其係一對中堅華基爾雲迪積克同伊巴希馬干拿迪，今季錯漏百出靠唔住，主帥施洛未必放心將防線壓得咁前踢逼搶，隨時又踢番控球在腳嘅「養生波」，先穩住防線。
新特蘭擺鐵桶博偷雞
另邊廂，新特蘭升班後令人眼前一亮，頭13輪僅3敗殺上前列，對住阿仙奴同「車仔」都拎到4分，上仗更落後2粒下反勝般尼茅夫3比2，熱血到暈。「黑貓」能異軍突起，防守出色係主因，特別客場踢得分外保守，近6場聯賽作客只失6球，全開3球或以下，造訪紅軍必定擺鐵桶陣，務求唔失波再博偷雞，唔慌多波入。
