歐霸：地頭龍維拉搶半W特醒_東方日報
特别贴士
2025-11-06 21:36:03
今晚歐霸焦點戰，阿士東維拉主場硬撼特拉維夫馬卡比。維拉一向靠主場搵食，上輪歐霸輸得肉酸，對住出唔到大場面嘅特拉維夫馬卡比，勢必先發制人，半場主勝有計。
（Now 643周五凌晨4時直播）文:法達斯維
英超老牌球隊阿士東維拉，捱過季初唔識入波嘅困局之後，漸入佳境，各項賽事近8仗獲6勝2負，除咗日前聯賽輸畀利物浦屬情理之內，上輪歐霸竟然不敵荷甲兵伊高斯，非常肉酸，球隊頭3輪獲6分排喺第10位，為爭入前8嘅直接晉級16強席位，今仗一定要搏命。查實維拉一向都靠喺自己地頭搵食，各項賽事近4場主場贏晒，其中3次喺上半場經已取得領先優勢，包括首輪歐霸贏博洛尼亞1比0，可見佢哋藉主場氣勢，能夠經常喺初段佔到甜頭。
特拉維夫馬卡比踢歐戰見底
另邊廂，以色列勁旅特拉維夫馬卡比屬典型山寨王，喺國內聯賽8戰獲6勝2和未輸過，位居次席，但出到歐洲賽場即刻現形，頭3輪歐霸只得1和2負，其中輸畀實力一般嘅米迪蘭特同薩格勒布戴拿模，兩場都失3粒兼半場已經落後，實在難登大雅之堂。唔好忘記，維拉主帥艾美利係「歐霸之王」，執教西維爾同維拉利爾期間，曾4度捧走此盃，特別有heart，特拉維夫馬卡比隨時半場都頂唔住。
