歐聯：魔人屈機曼城打爆黃潛_東方日報
特别贴士
2025-10-21 22:00:46
歐聯另一場「西英大戰」重頭戲，「黃色潛艇」維拉利爾主場惡鬥曼城。維拉利爾歐聯患上「恐英症」，近5次鬥英超球隊全部輸晒，撞正曼城近期有弗到漏油嘅艾寧夏蘭特，相信「藍月亮」可以反客為主，推介客勝。（Now 639周三凌晨3時直播）文:渡邊年
維拉利爾歐聯兩戰仍未打開勝利之門，分別以2比2打和祖雲達斯，首戰則作客以0比1不敵熱刺敗走英格蘭。事實上，維拉利爾於歐聯一直被英超球隊「恰死」，近5次鬥英超兵全敗，即使佢哋喺歐洲賽10次主場出擊6勝3和只輸過1次，但今場都唔係咁睇好。
夏蘭特連續11場士哥
曼城踏入9月愈踢愈順，啱啱喺英超以2比0擊敗愛華頓，球隊重拾霸氣，「魔人」艾寧夏蘭特喺球會同國家隊賽事，已連續11場上陣入波，弗到漏油。夏蘭特喺歐聯同樣交出高水準表現，呢名挪威射手喺過去32場歐聯分組賽/聯賽階段比賽，合共取得36個入波，唔使擔心佢會喺呢項歐洲最高水平跌Watt。
「藍月亮」另一重點爭標棋子，就係今季加盟嘅門將基安盧基當拿隆馬，呢名意大利國腳上屆協助巴黎聖日耳門贏得歐聯，大戰經驗豐富，而且領隊哥迪奧拿熟悉西甲球隊，臨場調動可作出針對性部署，今場有望反客為主，客勝放心捧場。
