外圍賽：前線天殘地缺作客冰島法國虛張聲細_東方日報
特别贴士
2025-10-13 17:12:18
今晚世盃歐洲區外圍賽D組焦點戰，法國作客硬撼冰島。「高盧雞」隊長基利安麥巴比受傷退隊，而且主帥迪甘斯仍未解決火力不足嘅老問題，冰島遇強只求輸少當贏，3.5球嘅入球細有計。（周二凌晨2時45分開賽）文:法達斯維
上屆亞軍法國於頭3輪世盃外圍賽贏晒，不過贏得最多嗰場，都係上周輕取阿塞拜疆3比0，表現未盡人意，尤其係上半場面對鐵桶陣，真係冇乜辦法，要靠基利安麥巴比個人表演，硬爆對方防線先至喺完半場打破僵局，可惜呢位弗爆隊長喺末段觸傷足踝舊患要提早離場，雖然冇乜大礙，但主帥迪甘斯為安全起見，亦費事得罪皇馬，決定畀佢退隊早啲返馬德里，攻力點都有影響。
進攻板斧單調難大炒
查實法國本身今次已經冇PSG孖寶奧士文尼迪比利及巴特利巴高拿，依家再有「麥總」傷出，前線剩番艾基迪基、桑馬迪達、尼干古、泰奧雲等，無論星味定級數，明顯都差一大截。而且迪甘斯嘅戰術太過一成不變，穩陣行先冇問題，但進攻板斧太單調，好容易畀對手洞悉，因此經常老鼠拉龜冇碇埋手。
另邊廂，冰島頭3輪1勝2負，上仗對住烏克蘭一度扳平下，末段連失兩粒，最終慘輸3比5，令佢哋認清自己有幾多斤両，今仗對住實力更強嘅法國，除咗死守都別無選擇，希望唔好輸咁多，「高盧雞」前線天殘地缺，亦只求贏波3分，加上近4仗全開3球或以下，今仗唔慌多波入，細盤係明智之選。
