外圍賽：盧森堡鐵桶唔易破德國主場虛張聲細_東方日報
特别贴士
2025-10-10 17:07:48
世界盃外圍賽歐洲區賽事繼續烽煙四起，貴為傳統勁旅嘅德國、法國同比利時，今晚分途出擊，都係對住低幾班嘅球隊，甚至係魚腩，上演強豪掠奪記，不過佢哋自身各有問題，就算遇弱又係咪咁易搶到分呢？咁就真係要睇過先知！
今晚世盃歐洲區外圍賽A組焦點戰，德國主場迎戰盧森堡。睇落強弱懸殊，但德國近期進攻老鼠拉龜，盧森堡已非昔日魚腩，一心死守要咬得入佢哋都唔易，寧捧3.5球入球細。
（周六凌晨2時45分開賽）文:法達斯維
進攻出問題考起拿高Sir
論名氣論實力，德國當然贏10條街喇，不過佢哋踏入2025年，各項賽事只得2勝1和3負。除咗喺歐國聯連輸畀葡萄牙同法國，認清本身實力與列強嘅距離外，接住出戰世盃外，首輪即落筆打三更，竟然淨吞斯洛伐克兩蛋，令人跌晒眼鏡，次輪鬥北愛爾蘭一度陷於苦戰，若非下半場幾分鐘內連入兩粒，能否贏波都成問題。
事實上，德國喺夏維斯、穆斯亞拿等因傷倦勤下，被迫起用基拿比等實力稍遜球員，攻力打折扣，今季轉戰英超嘅域斯雖然對北愛有士哥，但整體狀態同信心仍有待提升，「2米美斯」禾達美迪升呢大國腳後仲未開齋，近日更患感冒，今仗上陣成疑。因此德國經常出現老鼠拉龜情況，近兩仗世盃外尤其明顯，點樣打破鐵桶陣，就成為主帥拿高斯文最大難題。
雖然傳統弱旅盧森堡喺A組頭兩輪輸晒，但近年唔再好似以前咁任人魚肉。佢哋各項賽事近10場錄1勝4和5負，包括熱身賽爆冷贏過瑞典，而且客場一定擺鐵桶陣，近8場作客7次開3球或以下，最多都只係輸3球，防守有顯著改善，今場不妨捧3.5球入球細。
