英超：紐卡素趁病攞命火燒森林_東方日報
特别贴士
2025-10-05 23:31:29
今晚英超免費直播賽事，紐卡素主場火併諾定咸森林。紐卡素新兵「2米美斯」禾達美迪加盟後即交到貨，逐漸走出射手阿歷山大伊沙克離隊嘅陰霾，漸入佳境，相反森林自亂陣腳，「喜鵲」梗係趁你病攞你命喇，主勝有計。（ViuTV96台、Now 621周日晚9時直播）文:法達斯維
紐卡素唔單止季前買人處處碰釘，射手阿歷山大伊沙克更喊走人，嚴重影響戰績，各項賽事頭6場贏得1場咁大把。好彩喺轉會窗關閉前送走伊沙克，並從史特加簽入箭頭禾達美迪，球隊士氣、實力逐漸恢復，近3場獲2勝1負，所輸1仗只係臨尾香惜敗畀阿仙奴，非常唔抵，而禾達美迪加盟後已有3球進帳，包括上場歐聯豪贈聖基萊斯聯4蛋之役先開紀錄，呢位「2米美斯」極速融入，令人忘記「反骨仔」伊沙克，而對聖基萊斯聯省兩粒嘅安東尼哥頓，今仗聯賽刑滿可候命，攻力有保證。
澳普接手愈踢愈頹
另邊廂，上季殺上前列嘅諾定咸森林，季初因教頭紐奴發表不滿球隊言論，無喇喇食無情雞，可謂自亂陣腳，雖然新帥「澳普」普斯迪高路帶過熱刺捧歐霸盃，但佢接手後各項賽事6場未贏過，單計聯賽只得1和2負，球員愈踢愈冇信心。睇埋雙方近3次聯賽交手，紐卡素全部贏晒，擺明格食格，今仗可藉主場之利再挫森林，一於捧主勝。
