英超：馬德里打吡駁火入球騷_東方日報
特别贴士
2025-09-27 22:16:17
西甲上演「馬德里打吡」，馬德里體育會主場迎戰皇家馬德里，論雙方今季聯賽成績，榜首皇馬6戰全勝，無疑勝一籌，但馬體會近年對呢支同市宿敵，往往有超水準發揮，加上前鋒祖利安艾華利斯上場演完「帽子戲法」，有力同「銀河艦隊」駁火。考慮到皇馬近6場賽事有5次總入球開3球或以上，最好博中位數2.5球嘅入球大。
（Now632周六晚10時15分直播）文:Mic少
馬體會曾經開季首3場不勝，令教練施蒙尼備受壓力，幸好球隊近期演出有改善，包括周中以3比2擊敗華歷簡奴，祖利安艾華利斯包辦3個入球，已重拾射門鞋。另一位前鋒阿歷山大索洛夫停賽1場後，今仗可以復出，鋒線人腳齊整，更加有本錢攻入皇馬大門。不過，馬體會防守力今非昔比，近3仗合共失6球，恐怕抵擋唔住以基利安麥巴比為首嘅「銀河艦隊」鋒線。
麥巴比腳風勁順
至於皇馬由沙比阿朗素執教後，水準非常穩定，聯賽6戰全勝之外，歐聯亦贏波。麥巴比腳風極順，今季上陣7場入9球。另一位進攻主力雲尼斯奧斯祖利亞表現亦可圈可點，上仗入1球及1次助攻，以「銀河艦隊」現時強勢，應該會採取主攻，力爭再下一城。不過，考慮到皇馬防守欠佳，近5場僅1場保持清白之身，寧願博2.5球入球大。
