日聯盃：川崎前鋒半大追多鑽_東方日報
特别贴士
2025-09-03 22:57:27
晏半個鐘開賽嘅日聯盃8強首回合，仲有浦和紅鑽主場迎戰川崎前鋒，雙方踢法開放，紅鑽各項賽事近5仗上半場全部領先；川崎前鋒往往迅速入局同對手駁火，近5場上半場總入球開2球或以上，最好揀中位數1.5球嘅半場大。（無綫myTV SUPER周三晚6時30分直播）文:Mic少
紅鑽一開波Chur到盡
浦和紅鑽近5場比賽取得3勝2負，成績只屬一般，皆因往往「虎頭蛇尾」，當中聯賽作客柏雷素爾，上半場領先2球，但換邊後倒輸2比4。其後日皇盃主場鬥FC東京，同樣上半場領先，但最後輸1比2，可見球員唔識留放，上半場搏得太盡，導致後勁不繼。考慮到兩回合制淘汰賽，紅鑽必須把握今仗地利優勢，盡量贏多幾球，預料一開波就會主攻爭取入波。
另邊廂，川崎前鋒近5場比賽僅2勝1和2負，但比賽過程充滿娛樂性，不時炮製入球騷，包括以2比5不敵福岡黃蜂、贏名古屋鯨魚4比3，以及上仗贏町田澤維亞5比3。無獨有偶，呢3場上半場都踢成2比2，預料會延續豪邁風格。事實上，川崎前鋒曾於5月聯賽同浦和紅鑽交鋒，該仗上半場踢成1比1，最後打和2比2，半場大值得追捧。
