女歐國：瑞士為面子主場唔會縮_東方日報
特别贴士
2025-07-18 19:05:09
女狂牛超班半場大穩開
女子歐國盃8強，奪標大熱門西班牙女足對東道主瑞士女足。西班牙女足今屆賽事強勢出擊，分組賽以無敵姿態出線，嚟到淘汰賽更加無保留；瑞士女足作為主辦國，小組出線已經有晒交代，對住超晒班嘅「女狂牛」只能盡砌，留意到西班牙女足近4場半場全開2球或以上，1.5球半場大十拿九穩。
（HOY TV 76台周六凌晨3時直播）文:邪神
西班牙女足係上屆女子世界盃冠軍，但女子歐國盃卻從未奪冠，最佳成績只得第3名，今屆目標明確，直指冠軍，進入淘汰賽階段將會展示真正實力。佢哋陣容極之豪華，擁有兩位金球獎得主佩泰娜絲同邦瑪迪，場上表現亦盡展霸氣，在B組3戰全勝強勢晉級，3戰攻入14球屬各隊之冠，艾絲達干沙利絲累積4球暫列賽事射手榜首位，佩泰娜絲亦交出3球4助攻嘅球王級數據，不過球隊近兩仗共失3球，可見防線並非牢不可破，嚟到淘汰賽階段，「女狂牛」將會貫徹全攻型踢法，繼續搶攻。
雙方交手例多波入
瑞士女足在A組3戰僅得4分，靠得失球微弱優勢壓倒芬蘭女足取得次名出線，作為主辦國，呢個成績已經完成基本任務，今仗面對實力恐怖嘅西班牙女足，縮後死守作用不大，而且喺主場球迷支持下，預計佢哋將會放膽進攻，實行同對方駁火。兩隊喺兩年前女子世界盃16強相遇，當時西班牙女足大勝5比1，上半場領先4比1，可見雙方早段鬥攻早有先例，今仗再遇隨時再開入球騷，半場大好快達標。
