女歐國：為爭出線速戰速決女三獅半大攞威_東方日報
特别贴士
2025-07-13 20:45:43
女子歐國盃D組最後一輪，兩場同時開賽，兩戰全勝嘅法國女足要贏荷蘭女足問題不大，另一場英格蘭女足對威爾斯女足，「女三獅」出線未穩陣，必定希望上半場數多幾粒穩定優勢，佢哋近7場有6次半場開2球或以上，1.5球半場大值博。（HOY TV 76台周一凌晨3時直播）文:邪神
衞冕嘅英格蘭女足雖然喺D組落筆打三更，首輪不敵法國女足，幸好次輪及時回勇，憑蘿倫占士梅開二度，以4比0大勝荷蘭女足，重上正軌，今場只要擊敗威爾斯女足，就好大機會出線，但如果和波失分，隨時被淘汰出局，所以今場唔會有保留，一定去盡。
威爾斯女足喺D組頭兩輪全敗兼狂失7球，但如果今場贏波，仲有些微出線機會，所以佢哋亦唔會縮，不過威爾斯女足實力太弱，連同之前賽事近6場5度落敗，猶如冇骨魚腩，遇上「急先鋒」英格蘭女足，隨時上半場已頻頻失守，半場大好快夠數。
法國勢強再下一城
至於荷蘭女足對法國女足，荷蘭女足喺D組頭兩輪1勝1負，其中上場面對英格蘭女足竟然狂吞4蛋，表現慘不忍睹，現時因對賽成績不及同分嘅「女三獅」，雖然出線仍未絕望，但以其脆弱防線，焗攻隨時自暴其短。
同組法國女足兩戰全勝，而且兩場都係上半場已經領先，贏得甚具說服力，由於今輪輸波亦有機會出局，因此唔會輕敵，挾各項賽事10連勝之勢，無懼壓力甚大嘅荷蘭女足，熱捧客勝。
