女歐聯：弗到爆愈踢愈爽 兵來將擋拜女贏面高_東方日報
特别贴士
2024-10-09 17:23:29
7連勝弗到爆愈踢愈爽 兵來將擋拜女贏面高
拜仁無論男足定女足都喺國內「打橫行」，「拜女」近10季聯賽5度稱后，雖然喺歐聯仲未嘗過捧盃滋味，但近6屆5次至少入到8強，其中2021年更躋身4強，可惜不敵車路士女足無緣決賽，上屆分組賽出局就失威啲，因此今屆誓要捲土重來。「拜女」今季極速上力，各項賽事已豪取7連勝，一班球隊愈踢愈爽，自然希望食住個勢打響歐聯頭炮。
阿仙奴女足經歷季前換血，仍處於適應期，尤其係冇咗荷蘭女球王美迪瑪，火力明顯下滑，各項賽事近5場僅贏兩場，上場聯賽喺主場只能同包尾大幡愛華頓女足悶和「窿窿」，令人失望。何況佢哋對親拜仁女足都騰騰震，兩軍近4次交手，阿仙奴女足輸咗3次，擺明畀對手食住，作客更難以樂觀。
曼城遇巴塞等交學費
至於夜少少仲有一場D組重頭戲，曼城女足主場硬撼巴塞隆拿女足。曼城女足雖然屬英超新興勁旅，但出到歐聯未夠班，相反巴塞女足近年歐聯戰績彪炳，連續4屆殺入決賽兼3度稱后，挾開咧5連勝強勢，今場有力反客為主。（周四凌晨3時開賽）
