亞洲盃：淘汰賽但求穩陣過關 澳洲火力曳聽捱細界_東方日報
特别贴士
2024-01-29 20:01:13
今日亞洲盃16強展開，澳洲率先硬撼印尼。雙方實力有一段距離，有多位「歐洲兵」助陣嘅澳洲，無疑可以睇高一線，但「袋鼠兵團」今屆整體表現只屬一般，分組賽兩場勝仗都係小勝而回，加上各項賽事近5場總入球全開2球或以下，未必可以大勝晉級，主Ｗ又嫌太熱冇肉食，不如轉吼中位數2.5球嘅入球細。（HOY TV 76台周日晚7時30分直播）
澳洲今屆陣容以效力歐洲球會嘅「海外兵團」做骨幹，包括米杜士堡中場拉利麥基爾、李斯特城後衞哈里蘇達亞，以及阿爾克馬爾門將馬菲賴恩等人，實力及經驗都喺印尼之上。不過佢哋今屆發揮未見突出，分組賽首戰面對世界排名102位嘅印度，都要踢到下半場先至打破缺口，最終贏2比0，之後對敘利亞，亦「僅僅熟」小勝1比0，最後一場則同烏茲別克踢和1比1，可見攻力欠銳，加上嚟到淘汰賽階段，為免犯錯失波冇仇報，相信會踢得更為謹慎，只求贏波晉級，唔會爭取大炒對手。
印尼實力所限勢泊大巴
印尼世界排名146位，低過澳洲足足121位，而且佢哋3場分組賽只有1勝2負，勉強以其中一支小組最佳第3名身份出線，兩隊實力相距懸殊之下，預料印尼會「泊大巴」死守到底，希望捱到加時甚至互射12碼，否則難有晉級機會。雙方最近兩次交手已經要數到2009及2010年亞洲盃外圍賽，當時澳洲兩循環分別打和0比0及小勝1比0，今仗再嚟多次細盤絕對唔意外。
