意甲：博洛尼亞搶Ｗ趁熱食_東方日報
特别贴士
2024-01-05 18:47:02
意甲獨腳戲，博洛尼亞主場迎戰熱拿亞，今場最大賣點係雙方分別由同樣41歲嘅少帥莫達、基拿甸奴執教；呢兩位前意大利國腳球員生涯獲得輝煌成就，展開教波生涯之後，莫達戰績更勝一籌，率領博洛尼亞躋身前列位置，近期取得聯賽主場6連勝，主勝值得追捧。
（Now638周六凌晨3時45分直播）
莫達本身係巴西人，其後選擇代表意大利國家隊，球員生涯效力過巴塞隆拿、馬體會、國際米蘭及巴黎聖日耳門等勁旅，跟過唔少名帥學嘢。2022年9月成為博洛尼亞主帥後，成功改造球隊，成績蒸蒸日上。今季踏入收成期，現時排聯賽第5位，僅落後第4位費倫天拿2分，隨時可以殺入前4位，目前全隊鬥志十足，希望創造奇迹，奪取下屆歐聯入場券；以博洛尼亞今季9場聯賽主場取得7勝1和1負嘅佳績，今仗贏面相當大。
熱拿亞作客腳軟
另一邊廂，熱拿亞教練基拿甸奴球員時代踢過AC米蘭等球隊，甚至去過中超搵食，亦係意大利2006年世盃冠軍成員，同樣見慣大場面。熱拿亞今季亦有唔少佳作，包括早前爆冷打和兩支勁旅祖雲達斯及國際米蘭，但呢兩場都係主場賽事，事實上熱拿亞近5場聯賽作客輸4場，恐怕今仗不容樂觀。
