歐冠：ＰＳＧ穩陣行先博半場和_東方日報

特别贴士 2023-09-19 19:28:07

同晚歐聯分組賽「死亡F組」另一場賽事，巴黎聖日耳門（ＰＳＧ）主場迎戰多蒙特。ＰＳＧ今季喺安歷基執教下進行重建，踢法上較為務實，歐聯首戰多數先求穩陣，畀球員適應歐洲賽節奏，面對穩打穩紮嘅多蒙特，上半場多數會變成拉鋸戰，半場和值得一博。（Now 643周三凌晨3時直播）

ＰＳＧ今季放棄美斯、尼馬等名牌巨星，引入嘅戰將多數實而不華，烏拉圭防中文路爾烏加迪、斯洛伐克中堅史堅尼亞加入，令防守能力提升唔少。安歷基踢法更着重組織同控球，唔會輕率搶攻，尤其歐聯戰場寸土必爭，今仗更加會踢得謹慎，上半場將以試探同適應為先，節奏會較為緩慢。

多蒙特防守硬淨頂得住
另邊廂，多蒙特球員歐聯經驗豐富，上季分組賽只係輸過一場，曾經0比0守和曼城，防守相當硬淨。今仗作客小組最強嘅ＰＳＧ，相信會鞏固防守以1分為目標，翻查兩隊過去4次交手，有3仗半場都係未分高下，今場雙方都唔敢輕舉妄動，再開半場和機會頗高。

上一篇：歐冠：曼城火力猛大盤手到拿萊_東方日報

下一篇：歐冠：曼城火力猛大盤手到拿萊_東方日報