英超：維拉有前冇後大盤要愛_東方日報
特别贴士
2023-08-20 18:23:12
今晚英超頭場，阿士東維拉主場硬撼愛華頓。維拉喺主帥艾美利麾下有前冇後，加上上仗大敗，回師主場力爭贏波博反彈，對住愛華頓勢必以攻代守，2.5球大盤係不二之選。（Now621周日晚9時直播）
維拉上季季尾一輪連勝搶到歐協聯入場券，同主帥艾美利崇尚進攻打法不無關係。呢位西班牙教頭嗜攻戰術未變，連同熱身賽在內，近4仗全開3球或以上，包括上仗聯賽首輪造訪紐卡素，最終慘敗1比5，但要留意新兵翼鋒穆沙戴亞比一度入波扳平，極速融入，配合奧尼屈堅斯同泰利文斯，攻力不容小覷。不過維拉主力後衞泰朗明斯上仗重創有排抖，而代替佢嘅新兵柏奧托利斯又犯錯導致失波，明顯未適應英超快節奏，令防線存隱憂。
愛華頓往績輸蝕
另一邊廂，近兩季僅僅護級成功嘅愛華頓，上仗聯賽首輪立即輸畀富咸，佢哋今夏除咗引入老將艾舒利楊格及借得前鋒丹祖馬外，未有具分量收購，難怪實力未見提升。最重要係愛華頓近年對住維拉都未踢先怯，兩軍近4次碰頭「拖肥」輸晒，令維拉有恃無恐搶攻，但顧及到佢哋重攻輕守，捧入球大更明智。
