微信
朋友圈
微博
腾讯微博
QQ空间
QQ
西班牙啱啱喺女子世界盃以3:0輕勝哥斯達黎加，贏起上嚟清風送爽，簡直係兵不血刃。「狂牛」嚟緊分組賽只係面對日本同贊比亞，出綫問題應該唔大。
西班牙陣中大部分球員嚟自巴塞隆拿，控球組織方面已經贏在起跑綫，咁樣係咪代表可以挑戰冠軍寶座呢？艾爾就不敢苟同喇！雖然巴塞隆拿近年喺聯賽同歐聯嘅表現有所進步，但西班牙喺世界盃同歐國盃嘅成績無明顯嘅提升。況且，西班牙大炒對手嘅賽績，都係同啲級數較低嘅球隊比併，對住德國、英格蘭、美國、瑞典等實力較強嘅球隊，「狂牛」嘅優勢唔太明顯。
法國嘅情況同西班牙差唔多，陣中唔少球員嚟自橫掃8屆歐聯冠軍嘅里昂，但球隊至今仲未捧過歐國盃，上屆世界盃有晒主場優勢，都喺8強輸畀美國出局，成績亦比較波動，同其他歐洲強隊仲有些少距離。當然，「高盧雄雞」今屆有轉教練嘅變數，但從人腳實力同過往賽績嚟講，艾爾唔覺得法國可以成為今屆冠軍。
畢竟女子足球近幾年先冒起，唔少國家隊嘅根基尚未打穩。西班牙同法國大有進步空間，但呢刻要挑戰世界最高嘅位置，似乎言之尚早。艾爾
微信
朋友圈
微博
腾讯微博
QQ空间
