烏甸讓球勝醒里|東方日報
特别贴士
2023-05-04 18:59:10
今晚意甲快車，聯賽「一哥」拿玻里作客烏甸尼斯，拿玻里事隔33年再奪意甲冠軍已無懸念，近期明顯Hea住踢，反而烏甸主場特別硬淨，近6仗喺自己地頭出擊未輸過，烏甸受讓咁筍，當然捧讓球主勝。（周五凌晨2時45分開賽）
其實拿玻里上輪聯賽大有機會提前奪冠，聯賽排第2嘅拉素1比3反輸畀國米後，另一邊拿玻里主場對沙蘭力坦拿，「一哥」憑馬泰斯奧利華拉建功領先，只要保持勝局已經可以開香檳祝捷，點知喺84分鐘失守被沙蘭力坦拿逼和1比1，搞到冇得提前慶祝。
拿玻里Hea踢？
上輪之後，拿玻里領先拉素18分，聯賽剩餘最後6輪，由於拉素喺早一日、即周四凌晨出戰薩斯索羅，如果佢哋有乜閃失，拿玻里可能未踢今仗已經封王。睇番拿玻里各項賽事近5仗贏得1場，合共入得3粒咁大把，當中近3仗聯賽只得1勝2和，加上奪冠無懸念，心態放鬆下難免影響表現。
事實上，拿玻里球員個心可能已經去咗開Party，因為有報道指拿玻里喺自己主場安裝大螢幕直播今場比賽，賣飛畀未能隨隊出征嘅超過5萬名球迷，入場見證奪冠時刻，同球員共享喜悅。
排緊中游嘅烏甸踢緊風流波，近期更加明顯揀波踢，近3仗作客全敗吞7蛋，但主場就6仗未輸過，包括3比1贏AC米蘭，今場對住拿玻里肯定有「打大佬」心態，唔會放水，受讓當然值得捧場。
