6分波豁出去 奧堡史特加護級入球騷|東方日報
特别贴士
2023-04-22 20:05:29
今晚德甲上演護級大戰，奧格斯堡主場硬撼史特加。兩隊近期入得又失得，為咗搶分護級，呢場「6分波」必定豁出去，入球大值得捧場。
(周六凌晨2時30分開賽)
奧格斯堡已經5場未贏過，依家跌到落尾5，距離降班區只係多5分。查實奧格斯堡攻力唔差，近6仗聯賽轟11粒，新進德國國腳貝利沙士哥不斷，中場魯賓華加斯近期亦頻頻入波，可惜後防穿晒窿，近6仗聯賽失咗15球，之前對住禾夫斯堡同RB萊比錫，都係領先之下遭逼和，甚至反勝為敗，呢6仗有5次開3球或以上，「奧堡」絕對係有前冇後。
兩軍近期入得又失得
另一邊廂，史特加形勢更加水深火熱，依家淪為尾3，同尾2嘅史浩克04同分。但自從施巴斯坦漢尼斯今個月接手，成為史軍今季第4任教頭後，明顯有起色，領軍兩仗聯賽取得1勝1和，先戰勝護級勁敵波琴3比2，上仗面對「2哥」多蒙特，半場落後兩球兼打少個下，一度追和2比2，去到末段再失1粒諗住輸喇，點知補時又追3比3，堅有韌力，今仗「6分波」實搏錘，2.5球嘅入球大有計。
