利物浦回勇炒得起般茅|東方日報
特别贴士
2023-03-14 17:56:24
「雙紅會」大勝士氣高昂
英超勁旅利物浦近況全面回勇，上輪「雙紅會」7比0狂勝曼聯後士氣高昂，今輪作客護級分子般尼茅夫贏面極高。首循環利物浦曾經大勝9比0，而且兩隊近年交鋒，「紅軍」都係連場大炒絕不手軟，今仗進取啲，讓兩球照捧讓球客勝。
（Now 621及611周六晚8時30分直播）
利物浦上半季表現麻麻，但近期愈踢愈好，依家已經上番聯賽榜第5位，落後第4嘅熱刺3分但踢少1場，大有機會重返關鍵嘅前4位置，今仗肯定會搏盡。利物浦對上5場聯賽4勝1和兼且未失1球，狂數死敵曼聯7蛋更加將全隊士氣推上高峰，對住呢隊「紅軍」算般尼茅夫唔好彩。
季初碰頭狂派9蛋
穆罕默德沙拿、達雲紐尼斯同加普組成嘅攻擊線，近期成功擦出火花，相信之後比賽會愈夾愈純熟。事實上，利物浦對般尼茅夫有大量「屠殺紀錄」，兩軍過去7次對壘「紅軍」全部贏晒，其中6場更係大炒3球或以上，包括季初主場大派9隻光蛋。
般尼茅夫上仗被阿仙奴絕殺輸2比3，之前主場對曼城亦大敗1比4，近兩場聯賽仲狂失7球，證明佢哋面對頂級鋒線全無招架之力，今仗面對如日方中嘅「紅軍」，加上以往嘅黑暗歷史，今場再大敗絕對唔。
喺大戰前夕利物浦內部又有新消息，巴西前鋒羅拔圖法明奴早前宣布今夏約滿離隊，據媒體報道目前已經有6間歐洲球會向法明奴提出聘約，當中包括馬德里體育會、國際米蘭及加拉塔沙雷。
