特别贴士

爭冠關鍵戰爆發!曼城格食格客W拆廠|東方日報

特别贴士 2023-02-15 21:13:38
英超冠軍前哨戰爆發!「1哥」阿仙奴周四凌晨主場迎戰曼城,「兵工廠」今季一直長踞榜首,但近期狀態明顯回落,連續兩場聯賽都失分,領隊阿迪達今仗對住師傅哥迪奧拿嘅曼城,無論兵力、狀態同戰術都被食住,想反彈難度極高,博曼城客勝更好路。(Now621周四凌晨3時30分直播)

阿仙奴今季戰績突出,球隊亦一直沿用「勝利11人」打天下,不過部分主力近期出現疲態,進攻速度明顯減慢,令缺少加比爾捷西斯嘅鋒線突然死火,近3場賽事只入過1球,踢出1和2負嘅3仗不勝走勢,狀態同信心都令人懷疑,以年輕球員為主嘅阿仙奴,未必可以駕馭呢場壓力極大嘅關鍵戰。

近6次對賽全勝
事實上,阿仙奴領隊阿迪達雖然廣受好評,但只有4年執教經驗嘅佢,仍未經歷過爭冠壓力,相反佢嘅師傅哥迪奧拿奪冠無數,相同嘅控球、組織戰術比阿仙奴更加成熟,格食格下往往秤高一線,兩隊過去6次交手,曼城全部獲勝,包括上月喺英足盃將阿仙奴踢出局。


曼城上輪3比1輕取阿士東維拉,依家只係落後3分,今場贏波就可以登上榜首,戰意相當鮮明。王牌前鋒艾寧夏蘭特傷勢無礙,以佢嘅制空力,可以克制阿仙奴近期唔太穩陣嘅後防,加上菲爾科頓傷愈復出,令球隊如虎添翼,曼城客勝值得捧場。

发送给好友

分享至朋友圈