布拉加打卡搶客Ｗ|東方日報
特别贴士
2023-01-06 21:54:06
今晚有場葡超賽事，由辛達卡拉主場迎戰布拉加。布拉加今季表現強勢，現時穩佔三甲一席，上仗聯賽大炒榜首賓菲加3比0，近7仗6勝1負，近況弗到漏，今場作客排聯賽榜下游嘅辛達卡拉，3分冇走雞，客勝穩開。（周五凌晨4時15分開賽）
葡超冠軍一向不離波圖、賓菲加同士砵亭，而布拉加就係最接近Big3嘅一隊，亦都係歐霸盃常客；布拉加陣中主力有隊長兼葡萄牙世盃國腳列卡度賀達，佢喺卡塔爾世盃射入1球，塞爾維亞國腳烏洛斯拉錫亦有份去卡塔爾世盃，但未有上陣。
辛達卡拉陷降班危機
講到近況，布拉加可以話係捧場客恩物，季初各項賽事一度錄得8連勝，而且8仗僅失兩球，球隊近期亦持續有好成績，近7仗6勝1負，唯一敗仗係葡聯盃0比5輸畀士砵亭，但上仗葡超即以3比0大炒賓菲加，列卡度賀達更梅開二度，今仗定必乘勝追擊。
辛達卡拉近年成績平穩，但今季成績大跌，現居下游位置，有降班危機，佢哋最大問題係攻力弱，14仗僅入11球，入球數字排葡超尾3，近5仗1和4負表現極差，今仗對住弗到爆嘅布拉加，可謂凶多吉少。
