近6戰5勝氣勢勁 錫菲聯斬草除根|東方日報
特别贴士
2022-12-20 20:31:06
今晚英冠獨腳戲，韋根主場硬撼錫菲聯。兩軍實力強弱懸殊，韋根不但於下游掙扎，主場表現亦欠佳，撞正近6仗贏5場嘅錫菲聯，凶多吉少，客勝有計。(有線661及601台周二凌晨4時直播)
韋根愈踢愈頹，依家位處英冠尾二位置，雖然有阿仙奴名宿高路托尼早前接任為新帥，但喺上周首度領軍，縱然有威爾堅尼先拔頭籌，但最終只能打和米禾爾1比1，近12仗聯賽只得2勝2和8負，非常肉酸，若果單計主場聯賽，近6仗亦僅得2勝4負，當中多場係先失波，今仗就算主場出擊亦幫助不大。
早前大勝榜首般尼
相反，前列分子錫菲聯未有因世盃休戰而影響狀態，上仗憑老將比利沙柏一箭定江山，小勝哈特斯菲爾德1比0，呢個亦係佢自今年3月後首個聯賽入波，有助重拾信心。事實上，錫菲聯近6仗聯賽取得5勝1負，包括以5比2大破榜首般尼。若果單計客場聯賽，錫菲聯今季11仗獲6勝2和3負，係英冠作客成績第2佳球隊，今仗遇上態沉嘅韋根，可食住個勢反客為主，客勝不容錯過。
