新帥上任搶頭炮 格流半場勝沖喜|東方日報
特别贴士
2022-12-16 18:11:55
經過世盃短暫休戰後，蘇超今晚重開，打頭陣係「2哥」格拉斯哥流浪主場迎戰喜伯年。格流喺休戰期間換領隊，新帥米高比爾必想贏波開個靚頭，撞正狀態沉到冇朋友嘅喜伯年，必定搶韁博打響頭炮，半場主勝值得捧場。(Now638周五凌晨4時直播)
格流連續兩季季中易帥，上季因維拉撬走謝拉特無奈要換人，搵來球隊名宿雲邦賀斯接手，雖然取得蘇足盃冠軍，但於蘇超及歐霸盃屈居亞軍。來到今季，格流唔單止喺聯賽落後榜首些路迪9分，重返歐聯分組賽更6戰全敗，包尾出局之餘，僅入兩球但狂失22粒，非常肉酸，令雲邦賀斯冇得留低。
米高比爾得球員歡心
格流趁住世盃休戰期間易帥，邀得昆士柏流浪教頭米高比爾執教。查實粉絲對米高比爾並唔陌生，前季謝拉特帶領格流打破些路迪壟斷重奪蘇超冠軍，米高比爾就係佢助手，其後佢跟埋「謝老四」過檔維拉，今夏則決定單飛，執教英冠嘅昆士柏流浪，亦穩站中游證明自己，而且佢深受依家格流球員愛戴，日前同利華古遜「拍跳」亦大勝3比0，睇嚟佢今次回家有助穩定軍心。
另一邊廂，喜伯年位處中下游，在世盃休戰前7仗聯賽，僅得1勝6負，若果單計作客，更係4連敗，其中3仗半場已落後，見到都唔開胃，就算休戰期間嘅熱身賽，亦只得1勝1負，所贏嘅只係蘇冠球隊拉夫流浪，狀態認真麻麻，隨時半場都頂唔住有「新帥效應」嘅格流。
