主場迎戰墨爾本勝利 阿聯回勇大舉進攻|東方日報
特别贴士
2022-11-11 17:32:04
澳職好戲碼，阿德萊德聯主場迎戰墨爾本勝利。阿德萊德聯近況回勇，連挫珀斯光輝及西部聯取得2連勝，但佢哋開季5仗都有失球，成為爭勝隱憂，墨爾本勝利亦於上仗大炒紐卡素噴射機，打破近期悶局，雙方今仗鬥攻預期擦出火花，加上主隊近3仗全開3球或以上，入球大好路。
(myTVSUPER周五下午4時45分直播)
阿德萊德聯開季頭3仗僅得2和1負贏唔到波，近期終於有所改善，先贏珀斯光輝2比1打開勝利之門，上仗再以4比2擊敗西部聯，總括而言佢哋開季至今僅輸1場，現時排第3唔算太差，今仗迎戰墨爾本勝利力爭3連勝，都唔係冇機會，不過問題係佢哋後防靠唔住，開季5仗場場有失波，共失8球，加上近3仗全開3球或以上，轉攻入球大仲穩陣。
拿尼開齋好機會
墨爾本勝利首仗3比2擊敗FC悉尼後突然狀態下滑，連續3仗冇波入錄得1和2負，直至上仗主場4比0炒紐卡素噴射機，該隊今季矚目新兵前曼聯球星拿尼加盟後仲未開齋，今場對住阿德萊德聯唔算緊密嘅後防，係佢爭取士哥嘅好機會，捧入球大更有計。
