勝利引入強援大翻身|東方日報
特别贴士
2022-11-04 17:05:06
周五澳職賽事，墨爾本勝利主場迎戰紐卡素噴射機。墨爾本勝利開季成績一般，近3場聯賽只得1分，前鋒失靈係最大問題，不過球隊賽前成功用「傷兵特例」，簽入澳職殿堂級射手科拿路利，配合今夏引入嘅葡萄牙名將拿尼，鋒線極具卡士，主場出擊有望重現強大火力，迎戰前線同樣有睇頭嘅紐卡素噴射機，有望合演入球騷。（無綫myTVSuper周五下午4時45分直播）
墨爾本勝利連續3場交白卷後，球隊利用「傷兵特例」引援，成功邀請科拿路利加盟救亡，呢位烏拉圭射手喺142場澳職入82球，上季效力珀斯光輝踢16場亦入8球，證明狀態仍然好弗，佢開季亦有為珀斯光輝上陣，狀態唔係問題，有佢同拿尼、歷克迪亞高斯天奴組成嘅鋒線，令人期待。
噴射機射手開始上力
紐卡素噴射機同樣有強力前鋒壓陣，格魯吉亞射手米科達迪斯上季光芒四射，今季踢兩場聯賽亦已開齋，表現對辦。紐卡素噴射機球員平均年齡較輕，往往憑強大活力逼搶對手加快節奏，令賽事更加開放，翻查兩隊近3次交鋒，總入球全開3球或以上，今場博入球中位數2.5球大更佳。
