阿仙奴副選開蘇吼細盤|東方日報
特别贴士
2022-11-03 21:17:17
今晚歐霸盃A組尾輪賽事，阿仙奴主場迎戰蘇黎世。阿仙奴雖然嚟緊周末有對車路士嘅後顧，但殺雞焉用牛刀，面對包尾大幡蘇黎世，半力出擊都夠贏兼鎖定首名，佢哋近期喺歐霸盃少交收，3.5球嘅入球細更值博。（Now643周五凌晨4時直播）
阿仙奴原本上輪歐霸盃對燕豪芬，只需打和即鎖定首名，點知大意失荊州，作客淨吞兩蛋，將懸念留到今輪。由於小組第2要打多一圈淘汰賽先可以躋身16強，阿仙奴必定力爭首名，佢哋依家領先次席燕豪芬2分，仍掌握主動權，今仗贏波就肯定獲首名，戰意鮮明。
不過要留意，阿仙奴有中場硬漢格列沙加坐波監，而下仗聯賽要作客同市死敵車路士，更加惡啃，既然今仗對住5輪歐霸盃輸4仗嘅蘇黎世，主帥阿迪達可繼續玩輪換，好似上仗聯賽大勝森林省兩粒嘅雷斯尼爾遜可擔正，夠殺有餘。
蘇黎世仲有嘢爭唔會hea踢
另一邊廂，瑞士球隊蘇黎世只落後「3哥」波杜基林特1分，仲有機會爭上第3位博踢附加賽打歐協聯，仍有一定戰意，唔會任人魚肉。況且阿仙奴於今屆歐霸盃5輪獲4勝1負，其中3仗小勝1粒，而呢5輪全開3球或以下，預計贏波都係點到即止，3.5球嘅入球細穩開。
