利物浦殘陣讓波咪搞|東方日報
特别贴士
2022-10-29 19:40:12
今晚英超尾場，利物浦主場鬥列斯聯，表面上呢場係強弱懸殊，利物浦近6場主場5勝1和，列斯聯又4連敗，但值得留意係「紅軍」近4場聯賽主場有3仗只贏對手1粒。列斯聯近4場敗仗，亦有3場僅輸1球，加上利物浦傷兵眾多，今場要讓1.5/2球略嫌多，寧捧下盤。（Now621及611周日凌晨2時45分直播）
列斯聯頂得兩嘴
先講吓「紅軍」有乜傷兵，前面有迪亞高祖達同路爾斯戴亞斯，中場堤亞高艾簡達拿、艾法美路同拿比基達，後衞祖爾麥迪比同伊巴希馬干拿迪都受傷缺陣；此外，佐敦軒達臣喺周中歐聯鬥阿積士時亦受傷被換出。雖然達雲紐尼斯復出，穆罕默德沙拿、羅拔圖法明奴及華基爾雲迪積克等都在陣，但球隊接近地莊出戰，相信領隊高普都要錫住用，以免再添傷兵。
事實上，利物浦今季回復海鮮味，呢頭主場1比0擊敗曼城，轉頭又0比1作客不敵諾定咸森林，今場鬥列斯聯屬可勝不穩格局。列斯聯固然陷於低潮，近5仗只得1和4負，其中近4仗更錄得全敗，今仗要贏利物浦又真係有啲難度，但死守博和波攞番1分未必唔可以。列斯聯月中鬥阿仙奴亦只係僅敗0比1，今場大幅受讓咁着數，下盤絕對玩得過。
