利物浦開火大起森林|東方日報
特别贴士
2022-10-28 00:38:32
今晚英超早場上演強弱懸殊賽事，利物浦作客諾定咸森林。儘管賽程頻密，但利物浦基於前場逼搶踢法，對弱旅經常製造大比數賽果；森林雖然成績不濟，但主場敢於同對手鬥攻，今場極可能大手交易，3.5球入球大有計。（Now621及611周六晚7時30分直播）
利物浦近況回勇，歐聯及英超錄得3連勝，擊敗曼城一役固然士氣大振，佢哋對實力較次球隊更加唔留手，包括季初創下英超今季最大比數勝仗9比0痛擊般尼茅夫，早前又喺歐聯7比1狂數格拉斯哥流浪，只要出現進攻機會，「紅軍」攻擊球員就全力爭取入波。
星級前鋒盡情數胡
「紅軍」鋒線積極性毋須懷疑，羅拔圖法明奴、穆罕默德沙拿均具備數胡能力，新加盟嘅達雲紐尼斯更加唔會放過任何入波機會，佢上仗對韋斯咸一箭定江山幫球隊贏波，只係尚欠一場代表作，今場對森林係好機會。
諾定咸森林成績差勁，不過主場唔會放棄進攻，包括上次主場喺維拉身上搶得1分，近3次主場攻入5球，加上利物浦近3仗作客全開5球或以上，今仗隨時變入球騷。
