攻力欠奉海軍鬥水兵 華拉度列卡迪斯細均力敵|東方日報
特别贴士
2022-09-16 19:02:11
今晚西甲獨腳戲上演下游大戰，華拉度列主場鬥卡迪斯。呢場正宗「海軍鬥水兵」，雙方都無乜攻擊力，尤其卡迪斯聯賽5戰全敗0入球，今場相信會以死守博攞到第1分為目標，2.5球入球細係不二之選。
（Now632周六凌晨3時直播）
經過周中歐洲賽，又回歸聯賽，通常周五波都安排啲戲碼麻麻嘅賽事，不過歐洲賽好多時好睇，但投注難度就高啲，呢場就啱啱相反喇，好賭但唔好睇，兩支唔識入波球隊擺埋一齊，唔揀細仲玩咩好？
兩軍近5戰合共僅入3球
數字說明晒兩隊波情況，華拉度列5戰1勝1和3負，入3球失10球排17位，卡迪斯5戰0勝0和5負，0入球失14球排包尾。卡迪斯之前5場全部都對前列球隊，如巴塞隆拿、奧沙辛拿及畢爾包等，今仗難得遇着下游嘅對手，都希望攞到聯賽第1分，死守在所難免。華拉度列今仗雖然主場出擊，但要留意其實球隊進攻亦欠佳，開季至今僅入3球，防守亦唔算理想，冇必勝把握，今場相信入球唔會多，預咗悶戰一場，買完個細上床瞓覺，瞓醒收錢好過。
