夏蘭特豪言要幫藍月稱霸歐洲|東方日報

特别贴士 2022-09-14 20:59:56

艾寧夏蘭特倒戈「蜜蜂兵團」前夕，大賣口乖話加盟曼城嘅最大目標，就係要稱霸歐洲，更證實話佢用歐聯主題曲做手機鬧鐘聲嘅傳聞，係真有其事。

用歐聯主題曲做鬧鐘聲
夏蘭特加盟「藍月」後更上一層樓，7場賽事狂轟12球，佢今仗賽前表示：「我想進步、我想勝利同埋贏取錦標，我真係好鍾意歐聯呢項賽事，所有人都知道贏歐聯係我嘅畢生夢想。領隊哥迪奧拿同我一樣都係足球怪胎，我哋個腦只係得足球，呢個係我咁鍾意佢嘅原因。」

坊間一直有傳夏蘭特用歐聯主題曲做手機鬧鐘鈴聲，呢位射手親口承認：「我每朝早都係聽住歐聯主題曲起身，呢個係我最愛嘅賽事，呢件事係真嘅。」夏蘭特職業生涯為薩爾斯堡、多蒙特同曼城踢過20場歐聯，合共轟入25球，呢項數據冠絕歐聯，果然係佢「最愛賽事」。

上一篇：皇馬弗爆威比你睇|東方日報

下一篇：皇馬弗爆威比你睇|東方日報