主帥高下立見般尼唔赦西布朗|東方日報

特别贴士 2022-09-02 17:32:20

今晚英冠獨腳戲，西布朗主場鬥般尼。西布朗喺庸帥布魯士領導下，愈踢愈頹，相反般尼喺少帥高柏尼領軍後漸入佳境，兩軍鬥心高下立見，般尼仲有得受讓咁筍，讓球客勝咪錯過。

（有線661及601台周六凌晨3時直播）
西布朗上季季中搵嚟經驗豐富嘅布魯士執掌球隊，點知呢位前紐卡素領隊極度保守，搞到隊波愈踢愈唔對路，最終只排第10位，令人失望。今季西布朗表現依然未有改善，開咧7仗聯賽僅得1勝5和1負，頻頻失分影響士氣，其中5仗更係先失波，依家喺中游徘徊，爭升班嘅路途愈嚟愈遙遠，布魯士可謂責無旁貸。

高柏尼接手目標返英超
另一邊廂，今季降落英冠嘅般尼請嚟曼城名宿高柏尼接手。雖然呢位前比利時隊長教波經驗尚淺，但經過季初起伏期後，近期明顯反彈，連盃賽在內3連勝兼轟入8粒，老將前鋒積洛迪古斯鹹魚翻生，喺聯賽射入3粒，小將尼敦泰拿及貝利斯亦愈踢愈好。般尼目標重返英超，齋講戰意贏晒，作客分分鐘贏埋唔奇，讓球客勝有計。

上一篇：追趕榜首全力火併多蒙特鬥賀芬咸捧半場大|東方日報

下一篇：追趕榜首全力火併多蒙特鬥賀芬咸捧半場大|東方日報