水手鬥三箭例演入球騷|東方日報
特别贴士
2022-08-10 17:39:33
今晚日聯盃8強次回合，橫濱水手主場硬撼廣島三箭。水手喺首回合意外輸波，為收復前失必定火力全開，但三箭專攻盃賽唔會保留，雙方近年交手例演大騷，不妨向2.5球嘅入球大埋手。（周三晚6時開賽）
由於日前聯賽要火併勁旅川崎前鋒，水手於上周中首回合略有保留下，雖有里奧施亞拉一度扳平，可惜最終仍輸1比3，加上聯賽對前鋒又補時失守輸波，導致2連敗，預計今仗會強陣出擊，力爭反勝晉級兼博反彈。水手的確有強攻本錢，中前場坐擁里奧施亞拉、安達臣盧比斯、西村拓真及仲川輝人等進攻好手，難怪今季聯賽已攻入51球，火力冠絕群雄。
另一邊廂，三箭喺聯賽被前列分子拋離，因此將重心放喺盃賽，首回合無論係控球率、射門及中龍次數均更比水手優勝，贏波絕非僥倖。三箭今屆9仗日聯盃取得6勝1和2負，場場有入球，前鋒祖利亞山度士亦以6球高踞日聯盃射手榜榜首，而且三箭於上周六聯賽擊敗鹿角，比水手多一日休息，不容小覷。翻查紀錄，兩軍近4次碰頭，合共炮製13個士哥，有3仗開3球或以上，入球大更值博。
