水手搶Ｗ夠信心|東方日報
特别贴士
2022-07-03 19:36:22
為稱霸聯賽火力全開
日職今輪搶分大戰，清水心跳主場迎戰榜首橫濱水手。心跳現居榜下游位置，隨時要為護級而戰；日職1哥水手近況甚佳，近4仗聯賽全勝，以佢哋冠絕日職嘅強勁火力，預計心跳難阻其去路，再追客勝。
（有線664及604台周六晚6時直播）
心跳開季至今走勢持續向下，現時仲喺榜下游掙扎，事實上佢哋表現飄忽難靠，日聯盃及日皇盃相繼出局，雖然早前主場曾以3比1擊敗同屬中下游嘅福岡黃蜂，迎來難得勝仗，但之後喺日皇盃受挫，上仗作客大阪櫻花領先半場下亦被逼和1比1，難免打擊士氣，而且球隊進攻欠缺重心，巴西外援泰亞高辛坦拿經常缺陣，嚴重影響戰術發揮，面對榜首勁旅恐怕凶多吉少。
前線撻着對手難防
水手暫時領導群雄，但亦只有3分優勢，想繼2019年後再度稱霸日職，唔可以輕率了事。好在佢哋近況相當對辦，除前仗日皇盃0比2不敵櫪木SC出局外，近6仗豪取5勝，當中4場後防保持清白身，並且淨勝對手兩球或以上。其中上仗4比0大勝柏雷素爾，里奧施亞拉梅開二度，日本射手西村拓真亦有進帳，一班射手撻着晒，佢哋今季聯賽18仗攻入36球，場均入兩球，要攻破脆弱嘅心跳防線難度不大，客勝穩陣。
