主場出擊反而腳軟 全北汽車讓唔起大邱|東方日報
特别贴士
2022-06-25 19:21:17
六下午韓職，全北汽車主場迎戰FC大邱。全北汽車今季客強主弱，主場出擊總係老鼠拉龜，FC大邱今季和波偏多，有力頂住，今仗隨時難分高下，讓球客勝抵玩。
（無綫85台周六下午5時直播）
近年稱霸韓職嘅全北汽車，今季嚴重走下坡，客強主弱係主要原因。球隊9場聯賽作客，豪取7勝1和1負，包括以3比1擊敗「1哥」蔚山現代，不過返回主場反而腳軟，開咧後8仗聯賽主場，竟然只得2勝3和3負，包括打和FC江原同金泉尚武等弱旅，主場成績排韓職尾二，毫無班霸風範。
FC大邱作客表現硬淨
全北汽車今季主場夾埋只入得6球，可見只要對方作客時，肯死守泊大巴，全北就無計可施，正正因為主場戰績差勁，佢哋依家畀蔚山現代甩開。
FC大邱位處中游，開季後17仗聯賽有7場和波，而8場作客就有5仗打和，單計近4仗作客更全部和晒，包括末段建功逼和前列分子浦項制鐵1比1，加上今季主場對全北汽車亦係和波收場，表現硬淨，今場隨時有驚喜，讓球客勝千祈咪錯過。
