艦隊謝幕半和有計|東方日報
特别贴士
2022-05-20 18:19:48
備戰歐聯試陣為先
周六凌晨西甲最後一輪戲碼，皇家馬德里主場迎戰貝迪斯。早早鎖定西甲冠軍嘅皇馬，近期聯賽頻頻派副選出戰，貝迪斯防守硬淨，半力出戰嘅「銀河艦隊」未必能夠於開賽早段搶得先機，捧半場和好過。
（Now632及611周六凌晨3時直播）
今季提前重奪西甲冠軍嘅皇馬，早前已經喺馬德里舉行勝利大巡遊，同球迷分享喜悅，呢場係「銀河艦隊」今季最後一次地頭出擊，慶祝派對當然唔可以畀佢停。
貝迪斯近6仗作客開半和
不過嚟緊皇馬仲有場非常重要嘅比賽，就係喺歐聯決賽惡鬥利物浦，近幾輪聯賽例行公事，就成為佢哋備戰嘅好機會，捷西斯華利祖等出場機會較少球員，近仗經常獲派上陣，一方面等賓施馬等主力有更多機會養精蓄銳，另一方面領隊安察洛堤亦積極試陣，嘗試唔同球員配搭。半力出戰下，皇馬上場就被護級分子卡迪斯逼和1比1，今場攻力亦不宜高估。
貝迪斯今季勇奪西盃，亦已鎖定來屆歐霸席位，表現已經收晒貨。佢哋季尾防守出色，近6場作客法定時間只失過1球，全部半場都同對手打和。值得留意，球隊近4次作客皇馬保持不敗，而且4次都保住清白身，相信今場要應付皇馬攻勢問題不大，半場和值得再追。
