榜首雙雄直路踩油 A米爭標乘勇搶W|東方日報
特别贴士
2022-05-15 20:24:58
意甲「米蘭雙雄」今晚分途出擊，當中榜首AC米蘭主場鬥阿特蘭大。聯賽4連勝嘅A米只要餘下兩輪聯賽拎多4分，就可以相隔11年再度稱霸意甲，必趁地利乘勝追擊，加上佢哋近兩次對阿特蘭大贏晒，一於撐主勝。（Now638周一凌晨零時直播）
A米暫時領先國米兩分，根據意甲賽制，同分會先計對賽成績，而A米今季兩場聯賽對國米1勝1和，意味佢哋攞多4分就夠奪冠。今仗係佢哋主場謝幕戰，更加要趁機贏波，以免夜長夢多，加上一眾前線球員狀態大勇，辛度東拿利上仗就梅開二度，要攻破阿特蘭大防線，難度應該不大。
阿特蘭大今季成績倒退，已經篤定無緣前4，未能取得下屆歐聯入場券，球員難免洩氣，首循環主場對A米一度落後3球，最後輸2比3，踢法有前冇後，預料作客凶多吉少。
國米火盛大盤碌「卡」
至於2哥國米喺較後時間作客卡利亞里，國米爭標被動，惟有先做好自己。佢哋近7場聯賽贏6場，包括擊敗祖雲達斯同羅馬，上周中意盃亦憑比列錫加時連入兩球，以4比2擊敗祖記捧盃而回。「藍黑兵團」今季36場聯賽轟入78球，屬意甲之冠，阿根廷前鋒拿達路馬天尼斯今季聯賽已入19球，腳風甚順，料可迅速攻陷對手大門。卡利亞里都要搶分護級，遇強都唔會縮，前鋒祖奧柏度今季聯賽交出13球進帳，有力偷雞入波，一於捧2.5球大盤。（Now638周一凌晨2時45分直播）
