熱刺乘勇發維捧上盤|東方日報
特别贴士
2022-04-10 23:18:24
今晚英超尾場，阿士東維拉主場硬撼熱刺。維拉連戰連敗，明顯虛火已過，相反熱刺近6仗聯賽贏5場，氣勢如虹，難得依家升上第4位，為爭下屆歐聯入場券，必定食住個勢爭勝，熱刺今場讓平半，上盤值得捧場。（Now621周日凌晨零時30分直播）
維拉虛火已過等劏
阿士東維拉今季喺主帥謝拉特中途上任，並於冬窗借得巴塞中場菲臘比古天奴後，一度止跌回升。可惜隨着古天奴跌Watt，佢哋亦走勢回落，近3仗全部輸晒，其中上仗以1比2不敵狼隊，先有主力左閘盧卡斯迪治尼傷出，而入替佢嘅老將艾舒利楊格仲擺埋烏龍添，除咗射手奧尼屈堅斯保持水準外，其餘前鋒丹尼艾格斯、里安拜尼等均忘帶射門鞋，令球隊陷入攻不銳、守不穩嘅困局。
相反，熱刺弗到冇朋友，近6仗聯賽豪取5勝1負，只係輸過畀有C朗連中三元嘅曼聯，合共轟入21粒，單係前鋒孖寶哈利卡尼及孫興民便佔咗10球，而借將翼鋒古路施夫斯基更極速融入，3叉戟愈戰愈勇，上仗面對紐卡素，哈利卡尼雖然冇士哥，但不斷墮後做策應，佢同古路施夫斯基都交出助攻，「孫仔」更省兩粒，最終反勝5比1，火力全開。
熱刺依家與少踢一場嘅北倫敦死敵阿仙奴同分，僅憑較佳得失球升上第4位，為爭下屆歐聯入場券，往後聯賽不容有失，造訪態沉嘅維拉，一定趁機踩多兩腳，客勝咪錯過。
