邊緣人爭上位德國讓主色貨|東方日報
特别贴士
2022-03-26 17:04:36
今晚另一重點熱身賽，德國主場硬撼以色列。德國主力陣容基本已定晒，主帥費歷克今次主要考察新人及邊緣人，佢哋戰意毋須懷疑，以色列防守不穩，德國挾連勝之勢可予取予攜，直取讓球主勝。（有線662及602台周日凌晨3時45分直播）
德國喺費歷克上任後，7戰贏晒輕鬆取得世盃入場券，而佢嘅正選腹稿應已心中有數，今次最大意外嘅，係竟然冇召入多蒙特球員。除咗緬恩斯中場安東史達治首度入選外，達斯拿、羅賓高治、祖利安韋高及軒歷治斯獲得重召，既因有哥列斯卡等人受傷，亦有費歷克對右閘、防中、中堅等個別位置嘅正選或後備唔太滿意，希望透過國際賽找到合適人選，其中憑住喺賓菲加在歐聯16強淘汰阿積士嘅精彩演出，祖利安韋高事隔5年再獲徵召，梗係要踢爭氣波。
以色列防守勁曳等劏
以色列無緣進身世盃決賽周，主因係防守太差，10仗世盃外狂失21粒，單計近6仗場場有失波，今次連射手艾蘭沙維都冇入選，實力再打折扣。德國近期幾乎場場大勝，明顯喺費帥麾下信心爆棚，以具侵略性嘅逼搶不斷進攻，單計近3仗贏晒狂入17球，遇上猶如不設防嘅以色列，隨時再演大屠殺，讓球主勝讓二球一樣值得捧場。
