車仔士氣盛明恰水晶宮|東方日報
特别贴士
2022-02-19 18:51:37
今晚英超倫敦打吡，水晶宮主場鬥車路士。水晶宮今季終於唔使為護級而戰，不過佢哋實力仍同前列球隊有一段距離，今場遇正啱啱贏咗世冠盃嘅車路士好難爆冷，推介車路士客勝。（Now623周六晚11時直播）
水晶宮現時24戰5勝11和8負，比起之前幾季，經常喺聯賽最尾4格上上落落，有顯著進步，領隊韋拉功力唔錯。不過，球隊始終非富豪球會，增兵後實力當然唔會太過突飛猛進，近2個月面對利物浦、韋斯咸、熱刺及曼聯等都輸波而回，近5場聯賽只得3和2負，包括近2場以1比1打和諾域治及同賓福特互交白卷。
近8次交手全勝
車路士加時以2比1擊敗彭美拉斯贏得世冠盃後，返回英格蘭積極備戰，美臣蒙特受傷要抖幾個星期，但影響唔會太大，車仔下半季可以繼續多線發展。雖然車路士近排贏波過程有啲驚險，如果上半場未能入波，領隊杜曹仲有多名中前場球員變陣，唔需要太過擔心佢哋攻力，加上後防有艾度亞文迪把守最後一關，一般球隊好難攻破佢哋。
車路士可謂水晶宮剋星，無論干地、摩連奴、沙利、林柏特到現時嘅杜曹執教，3分都予取予攜，近8次交手車路士獲得全勝，今場客勝熱得有道理。
